குரு - சீடன்

இந்த ஞானம் எல்லாம் பெப்ரவரி 24 மட்டும் வரவில்லை.  அதன் பின்தான் கஜேந்திரனுக்கு இந்த ஞானம் பிறந்தது!

குரு - தேர்தல் திருவிழாவுக்கு இன்னும் அயந்து நாள்களே இருக்கிறது. நாளையேர்டு பரப்புரை முடிகிறது என நினைக்கிறேன். கள நிலவரம் எப்படி இருக்கிறது?

சீடன் - தமிழ்மக்கள் மிகத் தெளிவாக இருக்கிறார்கள். யாழ்ப்பாணத்தில் நடந்த அய்க்கிய மக்கள் சுதந்திர முன்னணிக் கூட்டத்தில் தமிழில் பேசிய மகிந்த இராசபக்சேயை மக்கள் கூக்காட்டி அவமானப் படுத்தியுள்ளார்கள். அதனால் ஆத்திரம்  அடைந்த அவர்   மனதில் இருந்ததை அப்படியே கொட்டித் தீர்த்துவிட்டார்?

குரு - வியப்பாக இருக்கிறதே? மக்களுக்கு இந்தத் துணிச்சல் எங்கிருந்து எப்படி வந்தது? மகிந்தர் அப்படியென்ன பேசினார்?

சீடன் -  அந்தக் கண்றாவியை ஏன் கேட்கிறீர்கள்? "நாங்கள் சிங்களம். நானும் சிங்களவன். அதனால் கேட்டுக்கொண்டு இரு, தமிழா. தலைதெறித்து நடந்துகொள்ளாமல்.... கேட்டுக்கொண்டு இருக்க முடியாவிட்டால் போ!" இவ்வாறு இராசபக்சே சிங்களத்தில் திடடடிய பேர்து அதனையும் புரிந்து கொள்ளாத தமிழ்மக்கள் தொடர்ந்து கூச்சலிட்டதால் "நான் நிறுத்த மாட்டேன். நீங்கள் சத்தம் போடப் போட இன்னும் இன்னும் நான் தமிழில் பேசத்தான் போகிறேன்" என இராசபக்சே ஆவேசப்பட்டார்.

குரு - இராபச்சேயின் கைக்கூலி டக்லஸ் தேவானந்தா என்ன செய்தார்? அவர் அவருக்குப் பக்கத்தில் இருந்திருப்பாரே?

சீடன் - இருந்தார். ஆனால் அவருக்குத்தான் எப்போதோ குளிர் விட்டுப்  போச்சே! மத்தியில் கூட்டாச்சி மாநிலத்தில் இணைப்பாட்சி என்றுமே பிரிக்க முடியாத வடக்கும் கிழக்கும் என்பதை மனிதர் எப்போதோ காற்றில் பறக்க விட்டு விிட்டார். இப்போது அவர் இராசபக்சேயின் எடுபிடி. யாழ்ப்பாணம் வந்த இராசபக்சேக்கு நிலப்பாவாடை விரித்து ஆலவட்டம் பிடித்து மேளதாளத்தோடு வரவேற்பதுதான் அவரது முழுநேர வேலை.

குரு - வெற்றிலைச் சின்னத்தில் போட்டியிடுவதற்குப் பதில் அடியேன் வீணைச் சின்னத்தில் போட்டியிட்டால் இரண்டு மூன்று இருக்கைகளைக் கைப்பற்றலாம் பிரபு"  என்று இராபக்சேயிடம் டக்லஸ் மண்டியிட்டு கேட்டாரமே?

சீடன் - கேட்டார். ஆனால் இராபச்சே சொன்ன மறுமொழியைக் கேட்ட தேவானந்தா ஆடி அலமலந்து வியர்த்துப் போனாராம்.

குரு - அப்படி என்ன சொன்னார்?

சீடன் - மேலதிக இருக்கை வேணுமா? அல்லது அமைச்சர் பதவி வேணுமா? மாதம் 30 இலட்சம் ரூபாயையும் இழக்கத் தயாரா?

குரு - பாதுகாப்பு அமைச்சின் செயலாளர் கோத்தபாய இராசபக்சே "தமிழ்த் தேசியக் கூட்டமைப்பின் தேர்தல் அறிக்கையை  வாசித்துப் பாருங்கள். அவர்கள் இன்னும் பிரிவினைவாதத்துக்கு முற்றுப்புள்ளி வைக்கவில்லை. அவர்கள் இன்றும் தனிநாடு பற்றிப் பேசுகிறார்கள். அதிகாரத்தைப் பகிர்வது பற்றிப் பேசுகிறார்கள். இன்றும் வடக்கு கிழக்கு இணைப்பதைப் பற்றிப் பேசுகிறார்கள். காவல்துறை அதிகாரம் பற்றிப் பேசுகிறார்கள். இவ்வாறு விஷமமான விடயங்களை மக்கள் மத்தியில் பரப்பி இனவாதத்தைத் தூண்டுகிறார்கள். நாங்கள் முப்பது ஆண்டு  காலமாகப் பல்வேறு இழப்புகளைச் சந்தித்து நாட்டில் நிலவிய பயங்கரவாதத்தை இல்லாதொழித்தோம். இனியும் பயங்கரவாதம் தலைதூக்க இடமளிக்க மாட்டோம். இவ்வாறு இனவாதத்தைத் தூண்டும் வகையில் செயற்படும் தமிழ்த் தேசியக் கூட்டமைப்பைத் தடை செய்ய வேண்டும்"  என்று பேசியிருக்கிறாரே?    அதனை வேளாண் அமைச்சர் மைத்திரிபால சிறிசேன வழிமொழிந்திருக்கிறாரே?

சீடன் - வி.புலிகளது பின்னடைவோடு இனச் சிக்கல் தீர்ந்துவிட்டதாக கோத்தபாயா கனவு காண்கிறார். அதனால்தான் தமிழ்த் தேசியக் கூட்டமைப்பின் அறிக்கை அவரது கோபத்தைக் கிளறியுள்ளது.  வேடிக்கை என்னவென்றால் இதுவெல்லாம் திட்டமிட்டு அரங்கேற்றப்படும் நாடகம் என்று கஜேந்திரன் வழக்கம் போல் உளறியிருக்கிறார்.

குரு - தமிழீழ நாட்டு அரசியல் நிலைமை எப்படி இருக்கு?

சீடன் - யாழ்ப்பாணத்தில் சுவரொட்டி விளம்பரத்தில் முதலிடம் இபிடிபிக்கு. இரண்டாவது இடம் இலண்டனில் இருந்து பண மூட்டையுடன் இறக்குமதி செய்யப்பட்டு நேரடியாக சிறிலங்கா சுதந்திரக் கட்சியில் கேட்கும் செவ்வேள். மூன்றாவது இடம் அவுஸ்திரேலியாவில் இருந்து இறக்குமதிசெய்யப்பட்டு அதே கட்சியில் போட்டியிடும் அனோஜன்.

குரு - தமிழ்த் தேசியக் கூட்டமைப்பின் பரப்புரைக்கு இந்தியா கோடி கோடியாக பணத்தை அள்ளிக் கொடுததிருக்கிறதாமே? யார் சொன்னது என்று கேட்காதே. சிரிஆர் வானொலியில் அதன் ஆஸ்தான ஆய்வாளர் மன்னிக்கவும் அரசியல்வாதிதான் சொன்னார்.

சீடன் - அது நல்லதுதானே?  பாவம் தமிழ்த் தேசியக் கூட்டமைப்பு.   அதற்கு யார் இருக்கிறார்கள் நிதி வழங்க? கஜேந்திரகுமார் போன்ற  கோடீசுவரர்கள் யாரும்  அதில் இல்லை. அதுதான் பரிதாபத்தில் இந்தியா கோடி கோடியாகக் கொடுக்கிறது போலும்.

குரு - தமிழ்த் தேசியத்திற்கான மக்கள் முன்னணிக்கு நிதி சேர்க்க தமிழ்ப் பல்கலைக் கழக பட்டதாரிகள் ஓன்றியம் முருகன் கோயிலில் கடந்த வியாழக் கிழமை ஏப்ரில் முட்டாள்த் தினம் அன்று மாபெரும் கூட்டம் நடத்தியதாமே?

சீடன் - என்னுடைய வாயைக் கிளறுவது என்று முடிவு செய்து விட்டீர்கள் போல் தெரிகிறது. இருந்தாலும் சொல்கிறேன். 'அலை அலையாகத் திரண்டு வாரீர்" என்று முன்னாள் நாடாளுமன்ற உறுப்பினர் சிரிஆர் வானொலியில் கெஞ்சிக் கேட்டும் கூட்டத்துக்கு வருகை தந்தவர்கள் தொகை வெறுமனே 41 பேர்தான்! ஆனால் கூட்ட அமைப்பாளர் விழுந்தும் மீசையில் மண்படவில்லை என்பது போல் "கடுகு சிறிது என்றாலும் காரம் பெரிது என்று" விட்டுக் கொடுக்காமல் பேசினார்.

குரு - எவ்வளவு பணம் சேர்ந்ததாம்?

சீடன் - அது சிதம்பர இரகசியம்.  நதி மூலம் ரிஷி மூலம் கேட்கப்படாது என்பார்களே? அதுபோல இந்த நிதி மூலம் பற்றியும் கேட்கக் கூடாது! ஆனால் வருவாயை விட செலவு கூடவாம்!

குரு - கடந்த வெள்ளிக்கிழமை அரசியல் களத்தில் கலந்து கொண்ட செல்வராசா கஜேந்திரன் எல்லோரையும் வறுத்தெடுத்தாராமே?

சீடன் - அதை ஏன் கேட்கிறீர்கள் குருவே?  உதயன் ஆசிரியர் வித்தியாதரன் றோவின் கையாள்.   சம்பந்தன் தமிழினத்தை விற்றுப் போட்டார்,  புலம்பெயர் தமிழர்கள் தமிழ்த் தேசியக் கூட்டமைப்புக்கு வக்காலத்து வாங்குகிறார்கள்.  வால்பிடிகிறார்கள்.... இப்படி சகட்டு மேனிக்கு எல்லோரையும் ஒரு பிடிபிடித்தார்.  வித்தியாதரனுக்கு செய்யப்பட்ட அர்ச்சனையைக் கொஞ்சம் படித்துப் பாருங்கள்.

"உதயன் பத்திரிகை சுடரொளி பத்திரிகை எங்களை நாங்கள் ராஜபக்சாவினுடைய ஆட்கள் என்பது போலவும் ராஜபக்சாவுடன் ஒப்பந்தம் செய்துவிடடு வந்து இங்கிருந்து  நாங்கள் செயற்படுவது போன்றும் கதைகளை தொடர்சியாக எழுதிக்கொண்டிருக்கின்றது. அது மக்களுக்கு பெரிய பாதிப்பை ஏற்படுத்திவிட்டிருக்கின்றது. பல்கலைகழக மாணவர்கள் மத்தியில் உதயன் பத்திரிகையின் இந்த  எழுத்து பெரிய தாக்கத்தை ஏற்படுத்தியிருக்கின்றது. இது றோவினுடைய ஒரு ஒழுங்கு.  உதயன் பத்திகை கூட றோவினுடைய ஏற்பாட்டில் இருந்து கொண்டு தான் விடுதலைப் புலிகளையும் கேவலப்படுத்தி அதன் கொள்கைகளையும் கேவலப்படுத்தி எங்களையும் கேவலப்படுத்தி எழுதுகின்றது ஏனென்று சொன்னால் நாங்கள் எடுத்துக்கொண்டிருக்கின்ற கொள்கைகளை மக்கள் மத்தியில் இருந்து பிரித்து எடுக்க முடியாமல் இருக்கின்றது. இந்த நேரத்தில் எங்களை கேவலப்படுத்துவதன் மூலம் மக்களை குழப்பிவிட முடியும். மக்கள் இதற்குள் இருந்து தெளிவு பெறுவதற்கு முதல் தேர்தல் முடிந்துவிடும் ஆகவே அப்படியான பிரச்சனை ஒன்று இருக்கிறது.  ஊதயன் பத்திரிகையை பொறுத்தவரை அதனுடைய ஆசிரியர் வித்தியாதரன் திட்டமிட்டு எங்களை கேவலப்படுத்த வேண்டும் என்றுதான் இந்த கட்டுரைகளை எல்லாம் எழுதியிருக்கிறார். இணையத்தளங்களில் அவர் அல்லது அவர் நண்பர்கள் சிலர் எங்களைப்பற்றி எழுத அதனை அப்படியே கொப்பி பண்ணி உதயன் பத்திரினை சுடரொளி பத்திகையிலும் போட்டு கொள்வார்கள். எங்களுடைய அறிக்கைகள் விளம்பரங்களை கூட பிரசுரிப்பதற்கு தயாராகவில்லை. அதாவது தமிழ் தேசிய கட்சியின் துரோகத்தனங்களை அம்பலப்படுத்துகின்ற வகையிலே நாங்கள் எழுதுகின்ற கொடுக்கின்ற விளம்பரங்களை கூட போடமுடியாதென்று யாழ்பாணத்திலுள்ள உதயன் பத்திரினை மறுப்பு தெரிவித்து திருப்பிவிடுகின்றது.  அப்டியான ஒரு நிலைமை தான் காணப்படுகின்றது."

இந்த ஞானம் எல்லாம் பெப்ரவரி 24 மட்டும் வரவில்லை.  அதன் பின்தான் இந்த ஞானம் கஜேந்திரனுக்குப் பிறந்தது. எந்த அரசமரம் என்பதுதான் தெரியவில்லை! 

குரு - தாம் ஒரு சமூகம் சார்ந்த நடுநிலை வானொலி என்று சொல்லிக் கொள்ளும் சிரிஆர் வானொலி எப்படி இந்த சேறுவாரிப் பூசும் திருப்பணியை அனுமதிக்கிறது?

சீடன் - படிப்பது தேவாரம் இடிப்பது சிவன் கோயில் என்பார்களே? அது மாதிரித்தான் சிரிஆர் வானொலி நடந்து கொள்கிறது. கேட்டால் நாம் இரு தரப்புக்  கருத்துக்கும் வாய்ப்புக் கொடுக்கிறோம் என்று இனிமையாகப் பேசுகிறார்கள். ஆனால் நடைமுறையில் தங்கள் தாளத்து ஆடக் கூடியவர்களை காற்றலைக்கு அழைத்து வருகிறார்கள். இப்போதெல்லாம் ஆய்வாளர்கள் நிலவன், துரைரத்தினம் போன்றோரை கைவிட்டு விட்டார்கள். தமிழ்நாட்டில் இருந்து அய்யாநாதன் என்றொரு ஆய்வாளரைக் கொண்டு வருகிறார்கள். அவர் தமிழ்த் தேசியக் கூட்டமைப்பு இந்தியாவின் கைப்பொம்மை, சம்பந்தன் இந்தியாவின் கைக் கூலி என்றெல்லாம் வாய்க்கு வந்தபடி திட்டுகிறார். அதனை உங்களின் இனிமையான ஒருவர் இரசித்துக் கேட்டுக் கொண்டிருக்கிறார். நான் கேட்கிறேன். சம்பந்தரைத் தூற்றுவதற்கு இந்த அய்யாநாதன் யார்? இந்தத் தூற்றலுக்குப் பெயர் ஆய்வா? அவர் ஆய்வாளரா?  அல்லது இங்குள்ள ஆய்வாளர்கள் போல் அவரும் ஒரு அரசியல்வாதியா? இந்த நிந்தனையை  எப்படி சிரிஆர் முகாமை அனுமதிக்கிறது?

குரு - நிலவன் நல்ல ஆய்வாளர் ஆயிற்றே? அவரோடு என்ன தகராறு?

சீடன் - வேறொன்றும் இல்லை. அவர் உண்மை பேசுகிறார். தமிழ்த் தேசியக் கூட்டமைப்பின் செயற்பாடுகளை இன்றைய உலக ஒழுங்கின் பின்னணியில் நியாயப்படுத்திப் பேசுகிறார். அது சிரிஆரின் நிகழ்ச்சி நிரலுக்கு ஒத்து வரவில்லை. எனவே சக்தியான ஒருவர் அவருக்கு ஒரு மின்னஞ்சல் எழுதியுள்ளார். "எமக்குப் பழைய நிலவன்தான் தேவை! அதாவது எம்மோடு ஒத்தூத வேண்டும். நாம் பாடும் பல்லவிக்கு அவர் அனுபல்லவி பாட வேண்டும்! என்பது இதன் பொருள்.

குரு - அதெப்படி தலையிருக்க வால் ஆட முடியும்?

சீடன் - என்னைக் கேட்டால்?  இதற்கான பதிலை சிரிஆர் முகாமைதான் தரவேண்டும்!

குரு - சீடன்

மகள் தாலி அறுந்தாலும் பருவாயில்லை மருமகள் சாகவேண்டும்!

திருமகள்

குரு - சனாதிபதி தேர்தல் முடிந்த கையோடு நாடாளுமன்றம் கலைக்கப்பட்டு அதற்கான தேர்தல் ஏப்ரின் 8 ஆம் நடைபெறப் போகிறது. வரலாறு காணாத வேட்பாளர்கள் களத்தில் குதித்திருக்கிறார்களாமே?

சீடன் - ஆமாம் குருவே! சனாதிபதித் தேர்தல் முடிவு இலங்கைத் தீவில் இரண்டு தேசங்கள் இருப்பதை துல்லியமாக எடுத்துக்காட்டியது. வட - கிழக்கு மட்டுமல்ல மலையகத்தில் நுவரேலியா மாவட்டமும் தேர்தல் திணைக்களத்தின் இணைய தளத்தில் பச்சை நிறம் பூசப்பட்டிருந்தது! இந்த ஆறு மாவட்டங்களும் தமிழர் - முஸ்லிம்கள் செறிந்து வாழும் மாவட்டங்களாகும். கிழக்கில் சேருவில மற்றும் அம்பார தேர்தல் மாவட்டத்தில் மட்டும் இராசபக்சே வென்றிருந்தார். இந்த இரண்டும் கண்மண் தெரியாத சிங்களக் குடியேற்றங்கள் மூலம் உருவாக்கப்பட்ட தேர் மாவட்டங்களாகும்.

குரு - தனி ஆவர்த்தனம் வாசித்த சிவாஜிலிங்கம் படு தோல்வி அடைந்து விட்டாரே?

சீடன் - சிவாஜிலிங்கம் நல்ல இனவுணர்வாளர். தேசியவாதி. ஆனால் அவரிடம் வேகம் இருக்கிற அளவுக்கு விவேகம் இருக்கவில்லை. இந்தியாவில் இருந்து கொண்டு ஆளும் கட்சிகளை ஒரு பிடி பிடித்தால் இந்தியா அதைப்பார்த்துக் கொண்டு சும்மா இருக்குமா? அதுதான் அவர் துபாயிலிருந்து திருச்சிக்கு வானூர்தியில் சென்று இறங்கிய போது திருப்பி அனுப்பட்டார். ஈழவேந்தன் 2000 இல் நாடுகடத்தப்பட்டதற்கும் இதுதான் காரணம். ஒரு அமைப்பில் இருந்தால் பெரும்பான்மை முடிவுக்குக் கட்டுப்பட வேண்டும். குழுமாடு போல நடந்து கொண்டால் மொத்தம் 9662 வாக்குகளைப் பெற்று கட்டுக்காசை இழக்க வேண்டியதுதான்!

குரு - ஆட்சித்தலைவர் தேர்தலை புறக்கணிக்க வேண்டும் என்று தேர்தலுக்கு முன்னர் அஇதகா பொதுச்செயலாளர் கஜேந்திரகுமார், உலகத் தமிழர் பேரவை போன்றவை வேண்டுகோள் விடுத்திருந்தன. ஆனால் மக்கள் அவர்களைப் புறக்கணித்து அவர்களது முகத்தில் கரி அப்பி விட்டார்களே?

சீடன் - சரியாகச் சொன்னீர்கள். தேர்தலுக்குப் பின்னர் செல்வராசா கஜேந்திரன் யாழ்ப்பாணக் குடாநாட்டு மக்களில் 75 விழுக்காட்டினர் தேர்தலை புறக்கணித்து விட்டார்கள் என ஒரு குழந்தைத்தனமான அறிக்கை விட்டார்! யாழ்ப்பாணத்தில் மொத்த வாக்காளர் தொகை 721,359. வாக்களித்தவர்கள் தொகை 185,132 (விழுக்காடு 25.66). யதார்த்தம் என்னவென்றால் யாழ்ப்பாண தேர்தல் மாவட்டத்தில் வாழும் மக்கள் தொகை அண்ணளவாக அய்ந்து இலட்சம் மட்டுமே. வாக்காளர் தொகை இதைவிடக் குறைவே. அப்படியென்றால் 50 விழுக்காட்டினர் வாக்களித்தார்கள் என வைத்துக் கொள்ளலாம்.

குரு - யாழ்ப்பாணக் குடாநாட்டு வாக்காளர்களை உதாரணம் காட்டினால் போதுமா? ஏனைய நான்கு மாவட்டங்களில் விழுந்த வாக்கு விழுக்காட்டையும் சொன்னால்தானே தமிழ்வாக்காளர்கள் எப்படி வாக்களித்தார்கள் என்பது தெரிய வரும்?

சீடன் - சரியாகச் சொன்னீர்கள் குருவே? வன்னி மாவட்டம் 40.33 விழுக்காடு, மட்டக்களப்பு 64.83 விழுக்காடு, அம்பாரை 73.54 விழுக்காடு, திருகோணமலை 68.22 விழுக்காடு, நுவரேலியா 77.19 விழுக்காடு வாக்களித்தார்கள்!

குரு - அப்படியென்றால் தமிழர் தாயகம் என்பது யாழ்ப்பாணத் தேர்தல் மாவட்டம் மட்டும் என்பது முட்டாள்த்தனம் எனச் சொல்ல வருகிறாய்? அதை விடுவம் நாடாளுமன்றத் தேர்தல் பற்றி என்ன சொல்கிறாய்?

சீடன் - அதே கதைதான். ஆட்சித்தலைவர் தேர்தலின் முன்பும் அதற்குப் பின்னும் தேர்தலைப் புறக்கணிக்குமாறு தமிழ்மக்களுக்கு வேண்டுகோள் விடுத்து மூக்குடைபட்டவர்கள் இப்போது தமிழ்த் தேசியக் கூட்டமைப்பைப் புறக்கணிக்குமாறு அதே யாழ்ப்பாணத்தில் நின்று அறிக்கை விடுகிறார்கள்.
குரு - விபரமாகச் சொல்.

சீட்ன் - குண்டுச் சட்டிக்குள் குதிரை விடுவதை வரலாறாகக் கொண்ட அகில இலங்கைத் தமிழ்க் காங்கிரஸ் மறைந்த மாமனிதர் சிவராம் அவர்களது முயற்சியினால் உருவாகிய தமிழ்த் தேசியக் கூட்டணியை உடைத்துக் கொண்டு தனியாகக் களம் இறங்கியிருக்கிறது. வேடிக்கை என்னவென்றால் கட்சித்தலைவர் அப்பாத்துரை வினாயகமூர்த்தி விலக மறுத்து தமிழ்த் தேசியக் கூட்டமைப்பில் தேர்தலுக்கு நிற்கிறார்.

குரு - காங்கிரஸ் இன்னும் உயிரோடு இருக்கிறதா?

சீடன் - அது பாருங்கோ அந்தக் கட்சி பரம்பரை பரம்பரையாக ஜி.ஜ. பொன்னம்பலம் குடும்பச் சொத்தாக இருந்து வருவதால் அதற்கு இறப்பில்லை! பொதுச் செயலாளர் பதவியை தங்களுக்குள் வைத்துக் கொண்டு தலைவர் பதவியை அலங்கரிக்க தங்கள் குடும்பத்தின் நெருங்கிய உறவினர்களை அமர்த்திவிடுவார்கள். அவர்களில் யாராவது முரண்பட்டால் இன்னொருவரை அந்த நாற்காலியில் உட்கார வைத்துவிடுவார்கள்! இப்போது கூட ஒரு மீன்பிடி அமைச்சர் பதவிக்காக பத்து இலட்சம் மலையகத் தமிழர்களது குடியுரிமை, வாக்குரிமை பறிபோவதற்கு காரணமாக இருந்த அஇதகாங்கிரஸ் கட்சியில் போட்டியிட்டால் கட்டுக்காசைப் பறிக்க கொடுக்க வேண்டும் என்ற பயத்தில் புதிதாக ஒரு முகமூடியை போட்டுக்கொண்டு அரங்குக்கு வந்திருக்கிறார்கள்.

குரு - என்ன முகமூடி?

சீடன் - தமிழ் தேசியத்திற்கான மக்கள் முன்னணி! விளக்குமாற்றுக்குப் பட்டுக் குஞ்சம் என்பார்களே? அதுதான் இது!

குரு - கட்சி என்றால் உறுப்பினர் பட்டியல், செயல்குழு, பொதுக்குழு, ஆண்டு மாநாடு என்றெல்லாம் இருக்க வேண்டுமே?

சீடன் - அப்படியொரு மண்ணாங்கட்டியும் இல்லை. 1977 ஆம் ஆண்டு தமிழர் விடுதலைக் கூட்டணியில் இருந்த காங்கிரஸ் யாழ்ப்பாணத் தொகுதியை குமார் பொன்னம்பலத்துக்கு ஒதுக்கித் தருமாறு கேட்டது. யாழ்ப்பாணத்திற்குப் பதில் வட்டுக்கோட்டைத் தொகுதியில் போட்டியிடுமாறு த.வி. கூட்டணி கேட்டது. அதற்குச் சம்மதிக்காத குமார் பொன்னம்பலம் கோபித்துக் கொண்டு கூட்டணிpயல் இருந்து வெளியேறி யாழ்ப்பாணத்தில் தனித்துப் போட்டியிட்டு கட்டுக் காசை இழந்தார். வட்டுக்கோட்டையில் த.வி. கூட்டணியில் போட்டியிட்ட மு.திருநாவுக்கரசு அமோக வெற்றிபெற்றார்.

குரு - அதே குமார் பொன்னப்பலம் சிங்களப் பேரினவாதிகளால் கொல்லப்பட்ட போது தேசியத் தலைவர் மேதகு பிரபாகரன் அவருக்கு மாமனிதர் பட்டம் கொடுத்து மேன்மைப்படுத்தினாரே? அதெப்படி?

சீடன் - நீங்கள் சொல்வது உண்மை குருவே! அவர் பிற்காலத்தில் தமிழர்களது தாயகம், தேசியம், தன்னாட்சி உரிமைக் கோட்பாடுகளை வலியுறுத்தியதோடு வி.புலிகளை சிங்கத்தின் குகைக்குள் நின்று கொண்டு ஆதரித்துப் பேசினார். எனவே அவருக்கு பாவ மன்னிப்பு வழங்கப்பட்டது. அது மட்டுமல்ல கஜேந்திரகுமாரை களம் இறக்கி வி.புலிகள் அவரை நாடாளுமன்றத்துக்கு அனுப்பி வைத்தார்கள்.

குரு - பொது எதிரியான சிங்கள பேரினவாதத்தையும் அதன் அடிவருடிகளையும் தீவிரமாக எதிர்க்க வேண்டிய கஜேந்திரகுமாரும் கஜேந்திரனும் என்ன சொல்கிறார்கள்?
சீடன் - அப்படிப் கேளுங்கள் குருவே! அவர்களது இலக்கு ஆளும் கட்சியின் வெற்றிலைச் சின்னத்தில் போட்டியிடும் அமைச்சர் டக்லஸ் தேவானந்தாவைத் தோற்கடிப்பது அல்ல. அவர்களது இலக்கு திருகோணமலையில் சம்பந்தரைத் தோற்கடிக்க வேண்டும். யாழ்ப்பாணத்தில் மாவை சேனாதிராசாவையும் சுரேஷ் பிரேமச் சந்திரனையும் தோற்கடிக்க வேண்டும். அதற்காக அங்கு சிங்கள இனவாத கட்சியான அய்க்கிய மக்கள் சுதந்திர முன்னணிக்கு நாலு கால் பாய்ச்சலில் தாவிய ஒரு குழுவை தாங்கள் நிறுத்தியுள்ளதாக கஜேந்திரன் முழங்கி இருக்கிறார். அதாவது திருமலையில் தமிழ்மக்கள் வாக்குகளைப் பிரித்து தமிழர் பிரதிநித்துவத்துக்கு வேட்டு வைப்பதுதான் திட்டம். அதனை எந்த ஒளிவுமறைவுமின்றிச் சொல்லி இருக்கிறார்.

குரு - மகள் தாலி அறுந்;தாலும் பருவாயில்லை மருமகன் சாகவேண்டும் என்று நினைத்த மாமியார் கதையாக இருக்கிறதே?

சீடன் - அதேதான் குருவே! சிங்களவன் வென்றாலும் பருவாயில்லை சம்பந்தர் தோற்க வேண்டும்! வேடிக்கை என்னவென்றால் பசில் இராசபக்சேயின் இலக்கும் சம்பந்தரைத் தோற்கடிக்க வேண்டும் என்பதுதான். யாழ்ப்பாணத்தில் யார் வென்றாலும் தமிழர் பிரதிநித்துவம் குறையாது. ஆனால் திருகோணமலை அப்படியல்ல. 2000 ஆம் ஆண்டுத் தேர்தலில் தமிழ் வாக்குகள் பிரிந்ததால் ஒரு தமிழ் வேட்பாளரும் வெல்ல முடியவில்லை. இம்முறை அங்கு 14 கட்சிகளும் 17 சுயேட்சைக் குழுக்களும் போட்டியிடுகின்றன. மற்ற மாவட்டங்களிலும் இதே கதைதான். தமிழர்களது வாக்கைப் பிரித்து தமிழ் தேசியக் கூட்டமைப்பின் பலத்தைக் குறைக்க வேண்டும் என்பது மகிந்தாவின் திட்டம். திட்டம் நிறைவேற சுயேட்சைக் குழுக்களுக்குப் பெருந்தொகை பணம் கொடுக்கப்பட்டுள்ளது.

குரு - அதாவது தமிழ் தேசியத்திற்கான மக்கள் முன்னணியும் அய்க்கிய சுதந்தி மக்கள் முன்னணியும் சம்பந்தரைத் தோற்கடிக்க தேர்தல் களத்தில் கைகோர்த்துள்ளன என்று சொல்?

சீடன் - ஆமாம் குருவே! ஆனால் எங்கள் மக்கள் மகா புத்திசாலிகள். விபரம் தெரிந்தவர்கள். எது தங்கம் எது பித்தளை என உரசிப் பார்க்கத் தெரிந்தவர்கள். அதனால்தான் ஆட்சித்தலைவர் தேர்தலில் இராசபக்சேக்கு எதிராக வாக்களித்து அவர் முகத்தில் கரி பூசினார்கள். வெளிநாட்டில் இருந்து கொண்டு சநஅழவந உழவெசழட மூலம் அரசியல் நடத்த ஆசைப்படுவர்கள் முகத்திலும் கரி பூசினவர்கள். இந்தத் தோதலிலும் அவர்கள் சரியான தீர்ப்பு வழங்குவார்கள் என்ற நம்பிக்கை இருக்கிறது. மக்கள் தீர்ப்புத்தானே மகேஸ்வரன் தீர்ப்பு! (ஏப்ரில் 2010)
 

குரு சீடன்

நாட்டு நடப்பு எப்படி இருக்கிறது?

குரு – நாட்டு நடப்பு எப்படி இருக்கிறது?

சீடன் - நாட்டு நடப்பு நல்லாகத்தான் இருக்கிறது. முள்ளிவாய்க்காலில் ஏற்பட்ட பின்னடைவுக்குப் பின்னரும் மக்கள் தமிழ்த் தேசியத்தையே நேசிக்கிறார்கள் என்பது நடந்து முடிந்த ஆட்சித்தலைவர் தேர்தல் முடிவுகள் துல்லியமாக எடுத்துக் காட்டிவிட்டது.

குரு – ஆட்சித்தலைவர் தேர்தலில் ஒருவர் போட்டியிட்டே தீருவேன். எதுவரினும் அஞ்சேன் துஞ்சேன் என்று மார்தட்டினாரே? அவருக்கு என்ன நடந்தது?

சீடன் - முட்டாள் நெருப்புச் சுடும் என்பதை கைவைத்துப் பார்த்துத்தான் தெரிந்து கொள்கிறான். ஆனால் புத்திசாலி மற்றவர்களது அனுபவத்தைக் கொண்டு நெருப்புச் சுடும் என்பதைத் தெரிந்து கொள்கிறான். தனியே ஆவர்த்தனம் வாசித்த சிவாஜிலிங்கம் தனிமரம் தோப்பாகாது என்ற உண்மையை கட்டுக்காசை இழந்துதான் படித்துள்ளார் என நினைக்கிறேன்.

குரு – வி.புலிகளிடம் சிக்கியுள்ள தமிழ்மக்களை விடுவிக்கவே "மனிதாபிமான நடவடிக்கை" மேற்கொள்ளப்பட்டது என்று மார்தட்டிய மகிந்தர் வட-கிழக்கில் மண்கவ்வியுள்ளாரே?

சீடன் - மகிந்தர் அப்படித்தான் நம்பினார். தனது கைக் கூலிகளான தேவானந்தா, கருணா, பிள்ளையான், சித்தார்த்தன் தனக்கு வெற்றி தேடித்தருவார்கள் என நம்பி மகிந்தர் ஏமாந்து போனார்.

குரு – தேர்தலைப்; புறக்கணிக்க வேண்டும். வட – கிழக்கு நீங்கலாக ஏனைய பகுதிகளில் வாழும் தமிழர்கள் தங்கள் வாக்கை விக்கிரமபாகு கருணரத்தினாவுக்குப் போட வேண்டும் என்று கோட் சூட் போட்ட புலம்பெயர் தமிழ்த்தலைவர்கள் அறிக்கைகள் விட்டார்களே?

சீடன் - தமிழ்மக்கள் அதனைப் புறக்கணித்துவிட்டார்கள். நுனிநாக்கில் ஆங்கிலம் பேசும் இந்தத் தமிழ்த் தலைவர்களுக்கு சாதாரண தமிழ்மக்களது நாடித் துடிப்புத் தெரிந்திருக்கவில்லை. அவர்களது உணர்வு புரியவில்லை.

குரு – அவர்கள் சொல்லைக் கேட்டுத் தேர்தலைப் புறக்கணித்திருந்தால் என்ன நடந்திருக்கும்?

சீடன் - என்ன நடந்திருக்குமா? இலங்கை வரைபடத்தில் வடக்கும் - கிழக்கும் நீல நிறமாகப் போயிருக்கும். அப்டியில்லாமல் அரச தேர்தல் ஆணையமே இலங்கை வரைபடத்தில் வட-கிழக்கை பச்சை நிறமாகக் காட்டியது!

குரு - இலங்கையின் மத்தியில் உள்ள நுவரேலியா கூட பச்சை நிறம் பூசப்பட்டிருக்கிறதே?

சீடன் - அங்கும் மகிந்தருக்குப் படுதோல்வி. அவருக்கு முண்டு கொடுத்த ஆறுமுகம் தொண்டமானுக்கும் தோட்டத் தொழிலாளர்கள் பட்டை நாமம் போட்டிருக்கிறார்கள். குருவே ஒரு உண்மை தெரிகிறது. அது என்னவென்றால் தமிழ்வாக்காளர்கள் எங்கிருந்தாலும் - வடக்குக் கிழக்கு, மத்திய மாகாணம், கொழும்பு மாவட்டம் - அவர்கள் ஒரே மாதிரிச் சிந்திக்கிறார்கள். மகிந்தருக்கு எதிராகவும் சரத் பொன்சேகாவுக்கு ஆதரவாகவும் பலத்த அச்சுறுத்தலுக்கு மத்தியிலும் தங்கள் வாக்குகளைத் துணிச்சலோடு போட்டார்கள்! யாழ்ப்பாணத்தில் டக்லஸ் வழங்கிய மது, பதவி, வேலை, பணம், மிதிவண்டிகள், கழிவறைகள், கோயில் புனருத்தாரணம் என எதற்கும் விலைபோகாமல் சரத் பொன்சேகாவுக்கு ஆதரவாக வாக்களித்தார்கள்.

குரு - இலங்கைத் தீவில் இரண்டு இனங்கள், இரண்டு தேசங்கள் இருப்பது மீண்டும் பன்னாட்டுச் சமூகத்திற்கு எண்பிக்கப்பட்டு அவர்களுக்கு ஒரு வலுவான செய்தி சொல்லப்பட்டிருக்கிறது என்கிறாய்?

சீடன் - ஆமாம் குருவே! . இரண்டு கொலைஞர்களில் யார் நல்ல கொலைஞன்? இரண்டும் பிசாசுகள் இரண்டும் வேண்டாம என்று கட்டுரை எழுதியவர்கள் இப்போது தேர்தல் முடிவு வெளியாகிய பின்னர் "இலங்கைக்குள் இரு நாடுகள்" "நாங்கள் வேறு நாடய்யா! நீங்கள் வேறு நாடய்யா? நிலத்தைப் பிரித்தவர்களால் தமிழர் மனதைப் பிரிக்க முடியவில்லை என்றெல்லாம் தலைப்புச் செய்தி போட்டும் இலங்கைப் படத்தில் தமிழீழத்தை பச்சை நிறத்திலும் சிங்களத்தை நீல நிறத்திலும் போட்டும் தங்கள் மகிழ்ச்சியைக் காட்டியுள்ளார்கள்.

குரு - இது திருமணம் செய்து வைக்க மாட்டேன் என்று சொல்லிவிட்டு பேரன் பிறந்ததும் அள்ளிவாரி கண்ணே, மணியே, கற்கண்டே, என் செல்வமே என்று கொஞ்சி மகிழ்வது போல இருக்கிறது என்று சொல்? அல்லது இரவல் புடவையில் இது நல்ல கொய்யகம் என்பது மாதிரி?

சீடன் - அதுதான் சொல்வது ஒன்றில் ஈணத்தெரிய வேண்டும் அல்லது நக்கத் தெரிய வேண்டும். இந்த இரண்டும் இல்லாவிட்டால் ஒருவரால் எந்தப் பயனும் சமூகத்திற்கு இல்லை!

குரு – வேறென்ன புதினம்?

சீடன் - கடந்த காலங்களில் தமிழ்மொழிக் கிழமை கொண்டாடப்பட்டு வந்தது. ஆனால் இந்த ஆண்டு தமிழ் மரபுத் திங்கள் என்ற பெயரில் தைமாதம் முழுதும் நிகழ்ச்சிகளை நடத்தி தைக் கடைசி நாளை பெரிய விழாவாக இளையோர் கொண்டாடினார்கள்.

குரு – சனம் எப்படி?

சீடன் - பருவாயில்லை. ஆனால் மக்கள் வருவதும் போவதுமாக இருந்தார்கள். குறிப்பாக நடன ஆசிரியர்களும் அவர்களது மாணவர்களும் தங்கள் நடனம் முடிந்தவுடன் மண்டபத்தை விட்டு ஒரே ஒட்டம். சும்மா சொல்லக் கூடாது விழா ஏற்பாட்டாளர்கள் ரொறன்ரோவில் உள்ள அத்தனை நடனப்பள்ளிகளையும் மேடையேற வைத்தார்கள்!

குரு – கனடாவில் தமிழ் வளருது என்று சொல்?

சீடன் - அப்படியும் சொல்லிவிட முடியாது. மூன்று பிள்ளைகளில் ஒரு பிள்ளைதான் தமிழ் படிக்குது. மிச்சம் இரண்டு பிள்ளைகள் தமிழ் படிப்பதில்லை. விழா தொடர்பாக வெளியிட்ட தமிழ் மரபுத் திங்கள் என்ற கையேடு சுத்தமாக ஆங்கிலத்தில் இருந்தது. அறிவிப்புக்கள் கூட ஆங்கிலத்திலும் இருந்தது. தமிழ்விழாக் கொண்டாடினாலும் சரி, வேறெந்த விழா கொண்டாடினாலும் சரி நம்மாக்கள் ஆங்கிலத்தை விட மாட்டார்கள்!

குரு – பட்டிமன்றம் நடந்ததாமே?

சீடன் - அதை ஏன் கேட்கிறீர்கள். தமிழ் மரபுத் திங்களுக்கு எள்ளளவேனும் பொருத்தமில்லாத தலைப்பில் பட்டி மன்றம் நடந்தது.

குரு – என்ன தலைப்பு?

சீடன் - தமிழ்மக்களின் அடையாளத்தைப் பேணுவதில் தமிழ்மொழி இன்றியமையாதது? இது ஒரு பாமரத்தனமான கேள்வி. தமிழ்மொழி அல்ல என்று பேசவந்தவர்கள் முட்டாள்த்தனமான வாதங்களை முன்வைத்தார்கள். சீக்கியனது குடுமியையும் முஸ்லிம்களது தொப்பியையும் மேற்கோள் காட்டி மொழி அல்ல இன்றியமையாதது என வாதிட்டார்கள். சீக்கியர், முஸ்லிம்கள், யுதர்கள் இவர்களது அடையாளம் மதம். மொழி அல்ல. ஆனால் தமிழர் கதை வேறு. அவர்களது அடையாளம் மொழிதான்.

குரு - தமிழ்மக்களின் அடையாளத்தைப் பேணுவதில் தமிழ்மொழி இன்றியமையாதது? என்ற தலைப்புக்குப் பதில் புலம்பெயர் நாடுகளில் தமிழ் வாழுமா? அல்லது மெல்லச் சாகுமா? என்று போட்டிருக்கலாம்.

சீடன் - ஆமாம். நல்ல காலம் நடுவர் தமிழ்மக்களின் அடையாளத்தைப் பேணுவதில் தமிழ்மொழி இன்றியமையாதது என்று சொல்லாடல் புரிந்த கன்னை வென்றதாக அறிவித்து நிலமையை சரிசெய்து கொண்டார். இன்னொரு வேடிக்கை. அவ்வையார் எழுதிய ஆத்திசூடிப் புத்தகம் வீட்டில் வைத்திருப்பவர்கள் கையை உயர்த்துங்கள் என்று கேடடபோது........

குரு – பல கைகள் உயர்ந்திருக்குமே?

சீடன் - அப்படித்தான் நான் நினைத்தேன். ஆனால் ஒரு கையும் மேல் எழவில்லை. பிள்ளைகளுக்கு பட்டும் பொன்னும் போட்டு அழகு பார்க்கும் பெற்றோர்கள் சின்னப் பிள்ளைகளுக்காகவே எழுதப்பட்ட ஒழுக்க நூல்களான ஆத்திசூடி, கொன்றை வேந்தன், நல்வழி, மூதுரை போன்ற நூல்களை வாங்கிக் கொடுப்பதில்லை. சொல்லிக் கொடுப்பதும் இல்லை!

குரு – ஒழுக்கம் இல்லாத வீரம், கல்வி, செல்வம் இவற்றால் பயனில்லை. அதனால்தான் வள்ளுவர் ஒழுக்கம் விழுப்பம் தருவதால் ஒழுக்கம் உயிரினும் ஓம்பப்படும் என்றார். சரி போகட்டும். இது முதல் முயற்சிதானே? அடுத்த ஆண்டு தமிழ் மரபத் திங்களை குறைகள் கழைந்து நிறைவாகக் கொண்டாடுவார்கள் என எதிர்பார்ப்போம்.  (February 05, 2010)
 

ஆசிரியர்
உலகத்தமிழர்

வணக்கம். இரண்டு கொலைஞர்களில் யார் நல்ல கொலைஞன், இரண்டும் பிசாசுகள் இரண்டும் வேண்டாம், சரத் பொன்சேகா  வேண்டாம் என்ற கருத்துப்பட எழுதிய கட்டுரைகளை வெளியிட்ட உலகத்தமிழர் இப்போது தேர்தல்  முடிவு வெளியாகிய பின்னர் "இலங்கைக்குள் இரு நாடுகள்" தமிழீழம் சிங்கள தேசம்" தாயகத் தமிழரால் மகிந்த நிராகரிப்பு, நிலத்தைப் பிரித்தவர்களால் தமிழர் மனதைப் பிரிக்க முடியவில்லை என்றெல்லாம் தலைப்புச் செய்தி போட்டும் இலங்கைப் படத்தில் தமிழீழத்தை பச்சை நிறத்திலும் சிங்களத்தை நீல நிறத்திலும் போட்டு மகிழ்வது என்ன நியாயம்? 

இரா. சம்பந்தனுக்கு முதல் வாக்கையும் சரத்பொன்சேகாவுக்கு விருப்பு வாக்கையும்  போடுங்கள் என்ற எனது கட்டுரையை வெளியிட்டால்  'அரசியல் கற்பு கெட்டுவிடும்' என்பதற்காக நிராகரித்துவிட்டு இப்போது தேர்தல் முடிவைப் பார்த்து மகிழ்ச்சி தெரிவிப்பது என்ன அறம்? 

திருமணம் செய்து வைக்க மாட்டேன் என்று சொல்லிவிட்டு பேரன் பிறந்ததும் அள்ளிவாரி கண்ணே, மணியே, கற்கண்டே, செல்வமே  என்று கொஞ்சி மகிழ்வது என்ன நியாயம்? இரவல் புடவையில் இது நல்ல கொய்யகம் என்பது மாதிரி இல்லையா?  

தமிழ்மக்கள் சரத் பொன்சேகாவுக்கு வாக்களிக்காது தேர்தலைப் புறக்கணித்திருந்தால் அல்லது மதில்மேல் பூனையாக தமிழ்மக்கள் இருந்திருந்தால் இலங்கை முழுவதுக்கும் நீல நிறம்  அல்லாவா பூசப்பட்டிருக்கும்? அது உலகளாவிய அளவில் எப்படியான அரசியல், இராசதந்திர  பாதிப்பைத் தமிழர்களுக்கு ஏற்படுத்தியிருக்கும?  

ஒன்றில் ஈணத்தெரிய வேண்டும் அல்லது நக்கத் தெரிய வேண்டும். இந்த இரண்டும் இல்லாவிட்டால் ஒருவரால் எந்தப் பயனும் இல்லை!

  

நக்கீரன்

(ஏப்ரில் 2010)

---

 

(1) இலங்கையில் நடைபெறவுள்ள ஐனாதிபதி தேர்தல் தொடர்பாக தமிழ் தேசியக் கூட்டமைப்பு முன்னாள் படைத்தளபதி சரத் பொன்சேகாவை ஆதரிப்பது என எடுத்துள்ள முடிவு பற்றியும் கூட்டமைப்பு நாடாளுமன்ற உறுப்பினர்களின் இரட்டை வேடம் பற்றியும் எனது கருத்துக்களை முன்வைக்க வேண்டிய கட்டாயத் தேவை ஏற்பட்டுள்ளது.

நான் முன்பு தமிழ் தேசியக் கூட்டமைப்பினருக்கு ஒரு பகிரங்க மடல் எழுதியிருந்தேன். அதை அனைவரும் வாசித்திருப்பீர்கள் என நம்புகின்றேன். தவிர்க்க முடியாத காரணத்தினால் அடிக்கடி என்னால் கருத்துக்களை வெளிக்கொணர முடியவில்லை. காரணம் தற்போதைய சூழ்நிலையில் மறைவிட வாழ்க்கையும் இக்கட்டான சூழ்நிலையும் ஏற்பட்டுள்ளதால் தாயகத்தில் ஒரு பகுதியில் இருந்து கொண்டே செயற்பட வேண்டி உள்ளது.

நான் மாத்திரமின்றி என்னைப்போன்ற பலர் இவ்வாறான நிலையில் மறைந்திருந்தும் மக்களோடு மக்களாக இருந்தும் செயற்பட வேண்டியுள்ளது. எமது விடுதலை என்ற வேட்கை இன்னும் எம்மை விட்டு அகல வில்லை. வீழ்ந்துவிட்டோம் ஆனால் மீண்டும் எழுவோம் என்ற நம்பிக்கையுடன் தொடர்ந்து பயணிக்கின்றோம்.

இனி விடயத்திற்கு வருவோம். எதிர்வரும் இலங்கையின் ஐனாதிபதி தேர்தல் தொடர்பாக கூட்டமைப்பு எடுத்துள்ள முடிவு மக்களுக்கு திருப்தி கரமாக இருக்கின்றதோ இல்லையோ ஆனால் பாராளுமன்ற உறுப்பினர்கள் தமது வசதிக்கும் தமது சொந்த தேவைக்கும் ஏற்ற வகையில் முடிவுகளை எடுத்துள்ளனர். இரு பாராளுமன்ற உறுப்பினர்களைத் தவிர ஏனையவர்கள் அனைவரும் தங்களது சொந்த நோக்கத்தைக் கருத்தில் கொண்டே செயற்பட்டுள்ளனர். அந்த இருவர் பற்றி பின்னர் பார்ப்போம்.

முதலில் பெரும்பாலான பாராளுமன்ற உறுப்பினர்கள் ஐயா சம்பந்தன் அவர்களின் வழிகாட்டலில் அவரின் பின்னால் சென்றுள்ளனர். சம்பந்தன் ஐயா ஆட்சி மாற்றம் வேண்டும் என்றும் அதற்காக சரத் பொன்சேகாவுக்கு ஆதரவு வழங்க வேண்டுமென்று கூறியுள்ளார். மகிந்தவின் ஆட்சி முடிவுக்கு வரவேண்டுமென கூறுகின்றார். ஆனால் அது உண்மைதான் இத்தனை கொடுமைகளைச் செய்த மகிந்தவின் ஆட்சியை இல்லாமல் செய்வதே நல்லது. ஆனால் அவர் சரத்பொன்சேகா நல்லவர் மாதிரியும் அவர் ஆட்சிக்கு வந்தால் தமிழ் மக்களின் பிரச்சினைகள் அனைத்தும் தீர்ந்துவிடும் என நம்புகின்றாரா? அவர் துணிந்து நின்று மகிந்தவின் ஆட்சியை கலைக்க வேண்டுமென கூறும் அளவிற்கு அவருக்கு தனித்துவமான துணிவு கிடையாது. அவர் வாய் வீரம் பேசினாலும் உள்ளுர பயந்தவர். நான் வன்னியில் வைத்து அவரைச் சந்தித்தபோதும் அவருடன் கதைத்தபோதும் இன்னும் சில எம்.பிக்களின் கதைகளை வைத்தும் அவரின் பல பக்கங்களை அறிந்து கொண்டவன். இது எமக்கு எல்லோருக்கும் அப்போதே தெரிந்திருந்தது.

பதில் - நீங்கள் யார் என்பது எனக்குத் தெரியாது. முன்னாள் போராளி என நினைக்கிறேன். ஆனால் இப்போது விரக்தி காரணமாகவோ அல்லது வேறு காரணங்களுக்கோ எல்லோர் மீதும் சேறு பூசுகிறீர்கள். உள்நோக்கம் கற்பிக்கிறீர்கள். எண்பிக்க முடியாத குற்றச்சாட்டுக்களை அடுக்கிறீர்கள். நீங்கள் ஒருவரே உத்தமர், சத்தியவான் என்று நினைக்கிறீர்கள். மகிந்த இராசபக்சேயின் ஆட்சி முடிவுக்கு வரவேண்டும் என சம்பந்தர் கூறுகிறார் அது உண்மைதான் என்கிறீர்கள். அப்படியென்றால் சரத் பொன்சேகாவுக்கு வாக்குப் போடாமல் அது சாத்தியமாகுமா? ஆட்சிமாற்றமும் வேண்டும் சரத் பொன்சேகாவும் வேண்டாம் என்பதில் உள்ள முரண்பாட்டை நீங்கள் கவனிக்கத் தவறிவிட்டீர்கள். அதாவது கூழுக்கும் ஆசை மீசைக்கும் ஆசை என்றவன் கதைமாதிரி.

(2) எனவே மகிந்தவை எதிர்ப்பது என்பது அவரால் மாத்திரம் எடுத்த முடிவு அல்ல. அவருக்கு பின்னால் சில சக்திகள் உள்ளன. பொன்சேக்கா ஐனாதிபதியாக வரவேண்டும் என்பது அமெரிக்காவின் விருப்பம். இதற்கு இந்தியாவும் எதிர்ப்பல்ல. எனவே இந்த வெளிநாடுகளின் துணையுடன்தான் அவர் இந்த முடிவுக்கு வந்தார். இவருடன் சுரேஸ் பிறேமச்சந்திரன் மாவை ஐயா ஆகியோருக்கும் தொடர்புள்ளது. இவர்கள் சேர்ந்துதான் இந்த முடிவை எடுத்தனர். இதற்காக பல கோடி ரூபா டொலர்களும் கைமாறியுள்ளது. இந்த விசயம் புரியாமல் ஏதோ சம்பந்தன் ஐயா மக்களுக்காக சரத்துடன் ஒப்பந்தம் செய்துள்ளார் என நம்பி அவரின் பின்னால் சில எம்.பி;க்கள் சென்றுள்ளனர்.

பதில் - இதெல்லாம் உமது கற்பனை அல்லது பிரேமை. முன்பு சம்பந்தர் இந்தியாவின் கைப்பொம்மை என்றீர்கள் இப்போது அவர் அமெரிக்காவின் கைப் பொம்மை என்றும் சொல்கிறீர்கள். நான் அறிந்தவரை இந்தியா தனது பொருண்மிய - பூகோள நலன்காரணமாக இராசபக்சே தேர்தலில் வெற்றி பெற்று வருவதை விரும்புவதாகச் சொல்லப்படுகிறது. எனவே சம்பந்தரின் முடிவு அவர் மற்றவர்கள் குற்றம்சாட்டுவது போல் இந்தியாவின் கைப்பொம்மையாக இருக்க முடியாது. இந்த முடிவுக்குக் காரணம் "இதற்காக பல கோடி ரூபா டொலர்களும் கைமாறியுள்ளது" என எந்த அடிப்படையும் இல்லாத குற்றச்சாட்டை முன்வைக்கிறீர்கள். இதையிட்டு நீங்கள் வெட்கப்பட வேண்டும். கோடி ரூபா டொலர் அல்ல ஒரு ரூபா டொலர் கைமாறியதாக உங்களால் எண்பிக்க முடியுமா? யார் கொடுத்தார்கள்? எந்த வைப்பகம் மூலம் கொடுக்கப்பட்டது? என்பதை அருள் கூர்ந்து சொல்ல முடியுமா? இப்படியான அடிப்படை இல்லாத குற்றச்சாட்டுக்களைச் சுமத்துவதையிட்டு நீங்கள் வெட்கப்பட வேண்டும்.

(3) இதில் தங்கேஸ்வரி, அரியநேந்திரன், கனகசபை போன்ற எம்.பிக்களுக்கு அரசியல் தெரியாது. இவர்கள் தற்செயலாக கருணாவின் செல்வாக்குடன் வந்தவர்கள். தற்போதும் அவருக்கு நன்றிக் கடனாக உள்ளனர். இதை வெளிப்படையாகவே கனகசபை ஐயா கூறியுள்ளார். இவர்கள் அடுத்த தேர்தலில் போட்டியிடுவது என்றால் சம்பந்தரின் பின்னால் சென்றே ஆகவேண்டும். இதுதான் இவர்கள் இந்த முடிவுக்கு வந்தனர். இவர்களுக்கு எங்கே மக்களை பற்றிய சிந்தனை உள்ளது.

பதில் - அப்படியே இருக்கட்டும். அரசியல் தெரிந்தவர்கள் யார் யார் என்பதை சொல்லமுடியுமா?

(4) சிறில் அண்ணை தமிழர் விடுதலைக் கூட்டணியைச் சேர்ந்தவர். இதனால் சம்பந்தரின் விசுவாசி அவரின் பின்னால் செல்லாவிட்டால் அடுத்த தேர்தலில் போட்டியிட முடியாது என்ற பயமும் இவருக்கு உண்டு. இவரைப் பற்றி எனக்கு நன்கு தெரியும். அவர் எம்.பியாக முன்பு பல தடவைகள் சந்தித்துள்ளேன். சந்தர்ப்பத்திற்கு ஏற்ற மாதிரி வாழ பழகிக் கொண்டவர். எப்படியாவது வாழ்ந்து கொள்வார். ஆனந்தன் எம்.பியும் இவரைப்போன்றவர்தான்.

பதில் - இப்படி எதற்கெடுத்தாலும் உள்நோக்கம் கண்டு பிடித்து அவதூறு சொல்வது அழகல்ல. அது உங்கள் விரக்தியை தீர்க்கமட்டுமே உதவும்.

(5) இனி இந்த தேர்தலில் இரண்டு பேரையும் ஆதரிக்கக் கூடாது என்று கூறியவர்கள் என்ன காரணத்திற்காக அப்படி முடிவெடுத்தார்கள் என்றும் பார்க்க வேண்டும். இந்த முடிவை எடுத்தவர்கள் மட்டும் சளைத்தவர்களா.

இதில் சிறிகாந்தா மற்றும் கிசோர் போன்றோர் ராஐபக்சவின் செல்லப்பிள்ளைகள். அவர் மீண்டும் ஆட்சிக்கு வரவேண்டுமென்று விரும்புபவர்கள். எனவேதான் ஆட்சி மாற்றம் பற்றி பேசாமல் இரண்டு பிரதான வேட்பாளர்களையும் ஆதரிப்பதில்லை என கூறியுள்ளனர். இவ்வாறு கூறினால் கட்சி எடுத்த முடிவுக்கும் தலை சாய்த்துவிட்டு ராஐசக்சவையும் சமாளித்துச் செல்லலாம். அல்லது இருவரையும் ஆதரிப்பதில்லை என கூறிவிட்டு ராஐபக்சவை மறைமுகமாக ஆதரிக்க திட்டமிட்டிருக்கலாம். இதன் சூத்திரம் அவர்களுக்கும் இறைவனுக்கும் தான் தெரியும்.

பதில் - நீங்கள் சொல்வது சரியாக இருக்கலாம். சிறிகாந்தா பட்டிக்குள் இருக்க மறுக்கும் கறுப்பு ஆடு என்ற எண்ணம் மக்களிடம் இருக்கிறது.

(6) சிறிகாந்தா பெரும் தொகை பணத்தை ராஐபக்சவிடம் பெற்றுவிட்டே சிவாஜிலிங்கத்தை தேர்தலில் இறக்கியதாகவும் ஒரு நண்பர் எனக்கு சொன்னார். இதிலும் பிழை இருப்பதாகத் தெரியவில்லை.

பதில் - இது கதைதான். நீங்களே சொல்லி விட்டீர்கள்.

(7) இனி இரண்டு வேட்பாளர்களையும் ஆதரிக்கக் கூடாது என விரும்பும் கஜேந்திரன், செல்வன் அடைக்கலநாதன், பத்மினி சிதம்பரநாதன், சிவாஐpலிங்கம் ஆகியோர் பற்றி பார்க்க வேண்டும். இவர்கள் அனைவரும் நீண்டகாலம் வெளிநாடுகளில் இருந்தவர்கள். அங்கு பல கூட்டங்களிலும் பேசியிருந்தவர்கள். இவர்களுக்கு இங்கு வந்தால் பெரும் ஆபத்தும் காத்திருந்தது. எனினும் வன்னியில் போர் உச்சக்கட்டத்தை அடைந்தபோது இவர்கள் எதுபற்றியும் வாய் திறக்கவில்லை.

முள்ளிவாய்க்கால் சம்பவத்திற்குப் பின் எல்லாமே முடிவடைந்துவிட்டது என்று நினைத்துக் கொண்ட பத்மினி அக்கா முதன்முதலாக இங்கு வந்து சேர்ந்தார். பின் அவர் ஐனாதிபதி ராஐபக்சவை நேரடியாகச் சந்தித்து கை குலுக்கிக் கொண்டார். அவரின் கையைக் குலுக்குவதற்கு அவரால் எப்படி மனம் வந்ததோ தெரியவில்லை. அரசியலில் நீண்ட அனுபவமோ போராட்டத்தில் எந்தவித பற்றோ பக்குவமோ இல்லாத இவரை அரசியலுக்குக் கொண்டுவந்ததே நாம் விட்ட தவறுதான். இவரை தேர்தலுக்கு வேட்பாளராக போட்டபோதே எமக்கு சந்தேகம் இருந்தது. அப்போது நாங்கள் சிலர் இது பற்றி பொறுப்பாளர்களுடன் விவாதித்திருந்தோம். இவர் பாராளுமன்ற உறுப்பினராகத் தெரிவு செய்யப்பட்ட பின்னர் பல சலுகைகள் வழங்கப்பட்டன. மிக முக்கியத்துவமும் கொடுக்கப்பட்டது. வெளிநாடுகளுக்கு அனுப்பப்பட்டார். ஆனால் அதனால் பெரியளவில் எமது போராட்டத்திற்கோ சமுகத்திற்கோ நன்மை கிடைக்கவில்லை. ஆனால் அவரின் குடும்பத்திற்கே நன்மை கிடைத்தது.

இவர் ஐனாதிபதியுடன் செய்து கொண்ட ஒப்பந்தத்தின் அடிப்படையில் இங்கு வந்ததும் அவருக்கு ஆதரவாகவே செயற்பட வெண்டியிருந்தால் இரு வேட்பாளர்களையும் ஆதரிப்பதில்லை என்ற நிலைப்பாட்டை எடுத்துள்ளார்.

பதில் - உடன்பாடு செய்து கொண்டார் என்பது நீங்கள் வீசும் அடிப்படையில்லாத குற்றச்சாட்டு.

(8) சிவாஐpலிங்கம், செல்வன் அடைக்கலநாதன், கஜேந்திரன் ஆகியோரும் பசில் ராஐபக்சே மூலம் ஐனாதிபதியுடன் கதைத்து ஒப்பந்தம் செய்தே இங்கு வந்து சேர்ந்தனர். இவர்கள் வெளிநாடுகளில் இருந்து கொண்டு நாங்கள் நாட்டுக்குச் சென்றால் எங்களை கொன்றுவிடுவார்கள் சிறையில் அடைத்துவிடுவார்கள் என்று வீராப்பு பேசிக் கொண்டிருந்தனர். ஆனால் இவர்கள் இங்கு வந்ததும் நடந்தது என்ன? எந்தவித விசாரிப்போ விசாரணைகளோ தொல்லைகளோ இல்லாமல் வரவேற்புக் கிடைத்தது. செல்வன் அடைக்கலநாதனை விசாரணை செய்தது கூட சிறிகாந்தாவினால் மேற்கொள்ளப்பட்ட ஒரு நாடாகமாகத்தான் உள்ளது.

இவர்கள் எக்காரணம் கொண்டும் ஆட்சி மாற்றம் வேண்டுமென கேட்கமாட்டார்கள். அதற்காக செயற்படவும் மாட்டார்கள். அப்படி ஏதும் செய்தால் அல்லது கதைத்தால் இவர்கள் செய்து கொண்ட ஒப்பந்தத்தை மீறியதாக பசில் உள்ளே போட்டுவிடுவார். இதனால் தங்களையும் காப்பாற்றி தங்கள் கதிரையையும் காப்பாற்றிக் கொள்வதென்றால் இரு பிரதான வேட்பாளர்களையும் ஆதரிப்பதில்லை என அறிவிப்பது பின்னர் பசில் ஊடாக ஐனாதிபதிக்கு விசயத்தை விளங்கப்படுத்தி அவருக்கு மறைமுகமான ஆதரவை வழங்குவது என்ற திட்டமே இவர்களிடம் உள்ளது.

பதில் - பதில் - உடன்பாடுகள் செய்து கொண்டார் என்பது நீங்கள் வீசும் அடிப்படையில்லாத குற்றச்சாட்டு. மற்றவர்களைத் தூற்றுவதே உங்கள் முழு நேர வேலையாக இருக்கிறது.

(9) இவர்கள் நாங்கள் பலமாக இருந்தபோது எமது பக்கமும் தற்போது சிங்கள பேரினவாதத்தின் பக்கமுமாக இருப்பதைப் பார்க்கும்போது தமிழ் மக்களின் தலைவிதியை நொந்து கொள்வதைத் தவிர வேறு வழியில்லை.

பதில் - கவலையை விடுங்கள். மக்கள் முடிவெடுக்கட்டும்.

(10) சிங்கள நாட்டின் ஐனாதிபதி தேர்தலில் யார் வென்றாலும் தமிழ் மக்களுக்கு எதுவும் கிடைக்கப்போவதில்லை. ஒவ்வொரு வேட்பாளர்களும் தாம் வெற்றி பெறுவதற்காக எமது தயவையே நாடுவார்கள். வெற்றி பெற்ற பின்பு எல்லாவற்றையும் மறந்துவிடுவார்கள். இதுதான் வரலாறு இதற்காக நாம் எமது இனத்தை விற்க முடியுமா? தமிழினத்தின் இரத்தத்தில் தோய்ந்த சரத் பொன்சேக்காவின் கரத்தை பலப்படுத்துமாறு இவர்கள் எந்த முகத்துடன் தமிழ் மக்களிடம் செல்ல உள்ளனர்.

பதில் - எத்தனை காலத்துக்குப் பழைய காலத்திலேயே நீங்கள் பயணிக்கப் போகிறீர்கள்? ஒரு மக்களாட்சி முறைமை - அது எவ்வளவு பலவீனமாக இருந்தாலும் - மக்கள் தங்கள் துருப்புச் சீட்டான வாக்குரிமையை பயன்படுத்த வேணடும். இலங்கையில் ஆட்சிக்கு வரும் ஆட்சித்தலைவரின் அதிகாரம் வவுனியாவோடு நின்றுவிடாது. நின்றால் அந்தத் தேர்தலைப் பற்றி நாம் கவலைப்படாது இருக்கலாம். ஆனால் யதார்த்தம் அதுவல்ல.

(11) கNஐந்திரகுமார் பொன்னம்பலம் தேர்தலை புறக்கணிக்க வேண்டுமென கூறியிருந்தார். அவர் தனது கட்சி எடுத்த முடியிலேயே நின்று கொண்டார். அவரைப் பொறுத்த வரையில் கொள்கையுடன் செயற்பட்டார் என்றே கூறவேண்டும். ஏனெனில் அவர் ஏனையவர்களைப் போல் எந்த பக்கத்திற்கும் அடிபணிய வேண்டிய தேவை இல்லை.

பதில் - மெத்த நல்லது.

(12) அடுத்து சிறையில் அடைபட்டிருக்கும் கனகரெத்திம் ஐயா. இவர் தேசியத்தில் ஊறிப்போன ஒருவர். அவர் இன்று நேற்று அல்ல நான் கட்ட காலத்தில் இருந்தே போராட்டத்திற்கென தன்னை அர்ப்பணித்தவர். முள்ளிவாய்கால்வரை தனது மக்களோடு மக்களாக இருந்து தற்போது அதற்காக சிறையில் அடைபட்டுள்ளார். அவர் நினைத்திருந்தால் சண்டை தொடங்கியவுடன் தனது குடும்பத்துடன் வெளியேறி இருக்க முடியும். ஆனால் அவர் அப்படி செய்தது கிடையாது. இறுதிவரை அந்த மண்ணிலேயே இருந்தவர். இவரைப்போல் எந்த ஒரு பாராளுமன்ற உறுப்பினரும் நடந்தது கிடையாது.

பதில் - சதாசிவம் கனகரத்தினம் சிறையில் வாடுவதற்கு மகிந்த இராசபச்சே தான் காரணம். ஆட்சியை மாற்றினால்தான் அவரைச் சிறை மீட்கலாம்.

(13) அடுத்து தற்போதும் வெளிநாட்டில் தங்கியுள்ள nஐயானந்தமூர்த்தி அண்ணையை எடுத்துக் கொண்டால் அவர் இரண்டு பிரதான வேட்பாளர்களையும் எதிர்த்திருந்தார். அவரைப்பொறுத்த வரையில் அவர் ராஐபச்சாவிடமோ பொன்சகாவிடமோ மண்டியிட வேண்டிய அவசியம் இல்லை. இதனால் இரண்டு பேரையும் அவர் ஆதரிக்கவில்லை. இவரும் எமது இலட்சியப் போராட்டத்திற்காகவும் தேசியத்திற்காகவும் நிறையவே அர்ப்பணிப்புகளைச் செய்தவர். இதனால் இன்று இங்கு வரமுடியாத நிலையில் உள்ளவர். இன்னும் இவரைப் பற்றிச் கூறுவதனால் 2004 ஆம் ஆண்டு பொதுத்தேர்தல் முடிந்தவுடன் தமிழ் தேசியக் கூட்டமைப்பு பிளவு படும் அபாயம் ஏற்பட்ட போது அதை மிகவும் சாதுரியமாக எதிர்கொண்டு முறியடித்தவர். மட்டக்களப்பு எம்.பிக்கள் கருணாவின் பக்கம் இருந்தபோது அதை உடைத்துக் கொண்டு வெளியேறியவர். அன்றிலிருந்து இன்று வரை தமிழ் தேசியத்திற்காக குரல் கொடுத்துக் கொண்டு வரும் ஒருவர்.

பதில் - நீங்கள் சொல்வது எனக்கும் உடன்பாடுதான்.

(14) எனவே இந்த நிலையில் தமிழ் மக்களின் விடிவுக்காக தமிழ் தேசியக் கூட்டமைப்பு ஐனாதிபதி தேர்தலுக்கு எடுத்துள்ள முடிவு என்பது அவரவர் வாழ்வுக்காகவும் சுயநலத்திற்காகவுமே என்பதில் எந்தவித சந்தேகமும் இல்லை.

2005 ஆம் ஆண்டு ஐனாதிபதி தேர்தலின்போது தமிழ் மக்கள் எடுத்த முடிவை பிழை என கூறும் சம்பந்தன் ஐயா போன்றோருக்கு தமிழ் மக்கள் இனியும் வாக்களிப்பார்களா என்பதை அடுத்து வரும் பொதுத் தேர்தல்தான் பதில் கூறவேண்டும.

பதில் - அப்போது வி.புலிகள் தங்கள் படை பலத்தின் அடிப்படையில் எடுத்த முடிவு சரியாக இருந்திருக்கலாம். இப்போது திரும்பிப்பார்த்தால் அது பிழையாகப் படுகிறது. காரணம் களத்தில் ஏற்பட்ட பின்னடைவுதான். இதைத்தான் சம்பந்தர் சொன்னார்.

முடிவாக கடந்த காலத்தை பட்டறிவின் அடிப்படையில் மீள் ஆய்வு செய்து அது தரும் பாடங்பளைப் படித்துக்கொண்டு செல்லும் பாதையில் நம்பிக்கையோடும் ஒற்றுமையோடும் பயணிப்போம்.

நன்றி

து.ஆதவன்.

நன்றி


நக்கீரன்